صباح الخير شو الصيام وياكم . الله يتقبل منا ومنكم صالح الأعمال ويجعل صيامنا خالصاُ لوجه الله الكريم . عزيزتي هذا هو سويت اليوم التاسع من رمضان وهو نوع من الحلويات الشرقية ألا وهي القطايف بإسم الله نبدأ:
محتاجين إلى مكسرات مشكلة . شخصيا أحب أشتري أكثر من نوع من المكسرات ويكون محمص وأخلطهم مع بعض ومكوناتهم (فستق , جوز هند , جوز , كاجو , زبيب , وقليل من القرفة)
ومحتاجين إلى عجينة القطايف المعدة مسبقاً . وطبعاً عزيزاتي نلاقيها جاهزة في رمضان في كان المخابز . بس احرصي انج اتشوفين التاريخ لانها لازم اتكون فريش وشغل نفس اليوم عسب ما تتقطع منج وانتي تحشينها بعدين.
وهذا شكلها من داخل تشبه خبز الجباب بس أصغر واتكون نيئ من الوجه
وطبعاً راح نحتاج إلى قطر ومقاديره هي : لكل 1 كوب سكر محتاجين ½ 1 كوب من الماء عسب يكون عندنا القطر خفيف واتخلينه يثور على الضو لحوالي الربع ساعة وبتشوفين إني نسبة كبيرة من الماي تبخرت. بس اذا حبيتي يكون القطر غليظ راح يكون مقدار السكر نفس مقدار الماي وطبعاً هذا راجع لنوع الحلو الي بتسوينة .
في البداية نحط حبة القطايف المفرودة على ادينا بهذي الشكل . وانحط مقدار ملعقة صغيرة من الحشو الي عندنا . ونحرص اني ما نكثر من الحشو عسب ما تتقطع حبة القطايف يوم نسكرها .
ونبدأ نضغط الجانبين مع بعض وبتلاحظون اني العجينة من داخل نئ فهذا الشي بيساعد انج لما تضغطين على الجوانب تلزق في بعضها بكل سهولة . مثل ما نلاحظ في الصورة أدناه.
ونستمر في الضغط على الأطراف لحد ما تتسكر.
وهذا شكل القطايف بعد الانتهاء من اغلاقها أحبتي .
وممكن تسكرون نص حبة القطايف بدون ما تحشونها مثل الحبة الي فوق وبعد القلي تحشونها بالقشطة والفستق الحلبي .
وماشاء الله هذي كانت الكمية الي سويتها عبارة عن 3 صحون
مرحلة القلي :- عزيزاتي لقلي القطايف محتاجين لزيت شبة عميق للقلي وطاسة فيها القطر وطاسة ثانية عليها مصفى عسب يوم انطلع القطايف من القطر انحطها على المصفى.
نقليهم في زيت تكون حرارة متوسطة لحد ما يصير لون القطايف ذهبي فاتح نطلعها من الزيت وبعدين انحطها في القطر وانقلب لحد ما تتشرب قليل منه وانصفيها . السموحة منك ما قدرت أصور غير هذي الصور لشكل القطايف النهائي تدرون كانت الساعة 6:30 الواحد محتاس في المطبخ .
أتمنى يكون حاز على إعجابكم أحبي وأنتظروني في المزيد من الوصفات المصورة ولا تنسون (؟؟؟؟)مع محبتي شيف شوكلاتة
